टोकियो । गत २८ फेब्रुअरीमा इरानमाथि भएको अमेरिका–इजरायली आक्रमणका कारण होर्मुज स्ट्रेट बन्द भएसँगै तेल आयातमा समस्या भोगिरहेको जापानले रुसबाट तेल किन्ने भएको छ ।
होर्मुज बन्द जारी रहेका कारण तेल संकटको समाधानका लागि जापानले युद्ध सुरु भएयता पहिलो पटक रूसबाट कच्चा तेल खरिद गर्ने भएको हो ।
रूसी सुदूर पूर्वको सखालिन–२ परियोजनाबाट तेल बोकेको एउटा ट्यांकर जापानतर्फ आइरहेको व्यापार मन्त्रालयका एक अधिकारीले जानकारी दिएका छन् ।
थोक बिक्रेता ताइयो आयल कम्पनीले खरिद गरेको यो ढुवानी यस्तो समयमा भएको छ, जब मध्यपूर्वबाट हुने कच्चा तेल आयातमा भारी निर्भर रहेको र संसाधनमा कमजोर जापानले आपूर्ति विविधीकरण गर्ने प्रयासलाई तीव्र बनाएको छ ।
रूसी तेलमा सन् २०२२ मा सुरु भएको मस्कोको युक्रेनमाथिको पूर्ण–स्तरको आक्रमणपछि लगाइएका अमेरिकी र युरोपेली प्रतिबन्धहरू लागू हुने छैनन् ।
सखालिन–२ तेल र प्राकृतिक ग्यास विकास परियोजना रूसको राज्य–नियन्त्रित ऊर्जा जायन्ट गाजप्रोमको नेतृत्वमा छ । जसमा जापानको मित्सुबिसी कर्पोरेशन र मित्सुई एण्ड कम्पनी प्रमुख शेयरधनीहरू हुन् ।
सन् २००८ बाट वर्षैभरि कच्चा तेल उत्पादन सुरु भएको थियो र त्यसको अर्को वर्षबाट तरल प्राकृतिक ग्यासको निर्यात सुरु भएको थियो ।
विश्वव्यापी जहाज ट्रयाकिङ वेबसाइट ‘मरिन ट्राफिक’ले उक्त ट्यांकर अप्रिलको अन्त्यमा सखालिनबाट छुटेको देखाएको छ । यो पश्चिमी जापानको एहिमे प्रिफेक्चरमा आइपुग्ने छ ।