टोकियो। गैरआवासीय नेपाली संघ (एनआरएनए) जापानले बहुसांस्कृतिक केन्द्र ‘नेपाल हाउस’ निर्माणका लागि हाल अघि बढाइएको जग्गा खरिद प्रक्रिया रद्द गर्ने निर्णय गरेको छ।
संघले उक्त जग्गाका लागि यसअघि भुक्तानी गरिएको सम्पूर्ण रकम सुरक्षित रूपमा संस्थामा फिर्ता ल्याउन आवश्यक पहल गर्ने तथा उपयुक्त विकल्प पहिचान गरी नेपाल हाउस निर्माण अभियानलाई निरन्तरता दिने जनाएको छ।
नोभेम्बर १५, २०२६ मा टोकियोको सिनओकुबोस्थित संघको कार्यालयमा अध्यक्ष सुवास लामिछानेको अध्यक्षतामा सम्पन्न संयुक्त बैठकले यी निर्णय गरेको संघद्वारा जारी प्रेस विज्ञप्तिमा उल्लेख छ।
बैठकमा एनआरएनए अन्तर्राष्ट्रिय समन्वय परिषद् (आईसीसी) का पदाधिकारी तथा सदस्य, एनआरएनए जापानका पूर्वअध्यक्ष तथा संरक्षक, राजनीतिक दलका भ्रातृ संगठनका प्रतिनिधि, क्षेत्रीय समितिका प्रतिनिधि र वर्तमान कार्यसमितिका पदाधिकारी तथा सदस्य सहभागी थिए। नेपाल हाउसका लागि खरिद प्रक्रियामा रहेको जग्गाबारे सार्वजनिक रूपमा उठेका प्रश्न, चासो र टीकाटिप्पणीका बीच बैठक बसेको हो।
बैठकमा परियोजनाको वर्तमान अवस्था, जापानका पछिल्ला नियम कानुनमा भएका परिवर्तनले पार्न सक्ने प्रभाव, संस्थाको आर्थिक लगानीको सुरक्षा, चिबामा संस्थाको नाममा रहेको जग्गाको व्यवस्थापन तथा भविष्यमा नेपाल हाउस निर्माणका विकल्पबारे छलफल गरिएको विज्ञप्तिमा जनाइएको छ।
खरिद प्रक्रिया रद्द गरी रकम फिर्ताका लागि पहल बैठकले हाल खरिद प्रक्रियामा रहेको जग्गाको खरिद अघि नबढाउने र प्रक्रिया रद्द गर्न आवश्यक कानुनी, प्रशासनिक तथा व्यावहारिक पहल गर्ने निर्णय गरेको छ। यसअघि भुक्तानी भइसकेको रकम संस्थामा सुरक्षित रूपमा फिर्ता ल्याउन आवश्यक समन्वय र सहजीकरण गरिने संघले जनाएको छ। संस्थाको लगानीको पूर्ण सुरक्षा तथा संरक्षणलाई प्राथमिकता दिँदै आर्थिक क्षति हुन नदिने उद्देश्यले पहल गरिने विज्ञप्तिमा उल्लेख छ।
यद्यपि, विज्ञप्तिमा भुक्तानी भइसकेको रकमको परिमाण, रकम फिर्ता हुने निश्चित समयसीमा तथा फिर्तासम्बन्धी सहमतिको विवरण खुलाइएको छैन। चिबाको जग्गाबारे अध्ययनपछि विकल्प तय गरिने बैठकले चिबा केनमा संस्थाको नाममा रहेको जग्गाको वर्तमान अवस्था, उपयोगिता, आर्थिक दायित्व, सम्भावित जोखिम र भविष्यमा उपयोग गर्न सकिने सम्भावनाबारे विस्तृत अध्ययन गर्ने निर्णय समेत गरेको छ। अध्ययनका आधारमा संस्थाको दीर्घकालीन हित हुने गरी उचित, सुरक्षित र प्रभावकारी व्यवस्थापनको विकल्प प्रस्तुत गरिनेछ।
उक्त जग्गाको व्यवस्थापनबारे तत्काल कुनै निश्चित विकल्प घोषणा गरिएको छैन। कार्यालयदेखि २०० जना अट्ने हलसम्मको परिकल्पना संघले नेपाल हाउस निर्माणको मूल अवधारणालाई निरन्तरता दिँदै उपयुक्त स्थान वा विकल्प छनोट गरेर बहुउद्देश्यीय तथा बहुसांस्कृतिक केन्द्र निर्माण गर्ने लक्ष्य राखेको छ।
प्रस्तावित केन्द्रमा एनआरएनए जापानको आफ्नै केन्द्रीय कार्यालय, पूजाआजा तथा नेपाली संस्कारका लागि छुट्टै कोठा र विवाह, व्रतबन्धलगायतका सांस्कृतिक तथा परम्परागत कार्य गर्न मिल्ने स्थानको परिकल्पना गरिएको छ। त्यस्तै, बैठक, सभा, सम्मेलन, सांस्कृतिक कार्यक्रम, तालिम तथा सामाजिक गतिविधिका लागि करिब १५० देखि २०० जना अट्ने सुविधासम्पन्न हल निर्माण गर्ने योजना छ। जापानमा क्रियाशील अन्य नेपाली संघसंस्थालाई समेत आवश्यकताअनुसार सहुलियतपूर्ण भाडादरमा पूर्वाधार तथा सभाहल उपयोग गर्न दिने अवधारणा अघि सारिएको छ। नेपाल हाउसलाई नेपाली समुदायको साझा भेटघाट, सांस्कृतिक संरक्षण, सामाजिक एकता तथा संस्थागत गतिविधिको स्थायी केन्द्रका रूपमा विकास गर्ने संघको भनाइ छ।
समुदायको भावना, संस्थाको आर्थिक क्षमता र परियोजनाको सम्भाव्यतालाई ध्यानमा राखी अध्ययन तथा कार्ययोजनामार्फत अभियान अघि बढाइने विज्ञप्तिमा उल्लेख छ। रोबिनप्रसाद शेरचनको संयोजकत्वमा समिति निर्णय कार्यान्वयनका लागि बैठकले एनआरएनए आईसीसीका वरिष्ठ उपाध्यक्ष रोबिनप्रसाद शेरचनको संयोजकत्वमा ‘नेपाल हाउस जग्गा व्यवस्थापन समिति’ गठन गर्ने निर्णय गरेको छ।
समितिको सदस्य सचिवमा आईसीसी एसिया प्रशान्त क्षेत्रका संयोजक दीपक कडेल रहेका छन्। समितिका सदस्यमा जापानस्थित प्रमुख राजनीतिक दलका भ्रातृ संगठनका प्रमुख प्रतिनिधि, नेपाल आदिवासी जनजाति महासंघ जापानका अध्यक्ष, नेपाल पत्रकार महासंघ जापानका अध्यक्ष तथा एनआरएनए जापानका निवर्तमान अध्यक्ष रहने व्यवस्था गरिएको छ।
सल्लाहकारमा महेश कुमार श्रेष्ठ, तिलक मल्ल र डा. राम गिरी रहने छन्। समितिलाई हाल खरिद प्रक्रियामा रहेको जग्गाको खरिद रद्द गर्न पहल गर्ने, भुक्तानी भएको सम्पूर्ण रकम फिर्ता ल्याउन समन्वय तथा सहजीकरण गर्ने र चिबामा रहेको जग्गाको व्यवस्थापनका विकल्प प्रस्तुत गर्ने जिम्मेवारी दिइएको छ।
यसैगरी, नेपाल हाउस निर्माणका लागि उपयुक्त विकल्प पहिचान गर्दै जग्गाको अवस्था, आवश्यक पूर्वाधार, कानुनी प्रक्रिया, आर्थिक सम्भाव्यता तथा दीर्घकालीन व्यवस्थापनबारे अध्ययन गर्ने कार्यक्षेत्र तोकिएको छ। समितिले आवश्यकताअनुसार उपसमिति गठन, संयोजक तथा सदस्य चयन र कार्यविभाजन गर्न सक्नेछ। अध्ययन, कार्यप्रगति तथा सुझावसहितको प्रतिवेदन सम्बन्धित निकाय र एनआरएनए जापानसमक्ष पेस गर्नुपर्ने व्यवस्था गरिएको छ।
समितिको कार्यावधि निश्चित मितिका आधारमा नभई तोकिएका जिम्मेवारी पूरा हुने अवधिसम्म कायम रहनेछ। जग्गा खरिद रद्द गर्ने र भुक्तानी फिर्ता ल्याउने प्रक्रिया निष्कर्षमा पुगेपछि तथा भावी नेपाल हाउसका लागि उपयुक्त विकल्प पहिचान गरी आवश्यक प्रक्रिया पूरा गरेर प्रतिवेदन बुझाएपछि समितिको कार्यावधि समाप्त हुने विज्ञप्तिमा उल्लेख छ।
बैठकमा सहभागीहरू संघले सार्वजनिक गरेको विवरणअनुसार बैठकमा आईसीसीका वरिष्ठ उपाध्यक्ष रोबिनप्रसाद शेरचन, निवर्तमान अध्यक्ष महेश कुमार श्रेष्ठ, उपाध्यक्ष ददिवल खड्का, उपमहासचिव पारसमणि पोखरेल, युवा संयोजक नवीन न्युरे, एसिया प्रशान्त क्षेत्रका संयोजक दीपक कडेल र उपसंयोजक श्रवण सन्त्याल सहभागी थिए। आईसीसी सदस्यहरू सुमन कार्की, शिवहरि पौडेल, जीवन न्यौपाने र सुरेन खड्काको पनि उपस्थिति थियो।
त्यस्तै, एनआरएनए जापानका संरक्षक ओम गुरुङ र देवी लाल भण्डारी, प्रवास नेपाली सम्पर्क विभाग जापानका प्रमुख दीपक कार्की, नेपाली जनसम्पर्क समिति जापानका सभापति राजेन्द्र जमरकट्टेल, प्रवासी नेपाली मञ्च जापानका उपाध्यक्ष महेन्द्र अधिकारी, अन्तर्राष्ट्रिय नेपाली मञ्च कार्यसमितिका संयोजक हरि लामिछाने तथा नेपाल पत्रकार महासंघ जापानका अध्यक्ष रविन्द्र श्रेष्ठ ‘गोर्खाली’ सहभागी थिए। क्षेत्रीय समितिका तर्फबाट चिबाका संयोजक राजन बाबु सुवेदी र कान्तोका सचिव सोहन कुमार खत्री उपस्थित थिए।
एनआरएनए जापानको वर्तमान कार्यसमितिबाट अध्यक्ष सुवास लामिछाने, वरिष्ठ उपाध्यक्ष टीकाराम खरेल, उपाध्यक्षद्वय मुक्तिराम खनाल ‘बिनोद’ र दिलीप कँडेल, क्षेत्रीय उपाध्यक्ष विष्णु प्रसाद सुवेदी ‘विश्व’, महासचिव श्याम कुमार श्रेष्ठ ‘श्याम शीतल’, महिला सचिव ललिता तामाङ तथा सचिव एवं क्षेत्रीय सचिव सागर कार्की सहभागी थिए। यसैगरी, कोषाध्यक्ष मुक्तिराज रेग्मी, सहकोषाध्यक्ष रामु कँडेल, महिला सहकोषाध्यक्ष कामना भण्डारी, प्रवक्ता सचिन आचार्य, युवा संयोजक दीपक पुर्जा मगर, महिला संयोजक मन्जु गिरी तथा सदस्यहरू नवीन दीप गुरुङ, कमलेश जिसी, रमेशराज जैसी, बिनुका खड्का, सन्तोषी अधिकारी र देवेन्द्र तामाङको उपस्थिति रहेको विज्ञप्तिमा उल्लेख छ।
पारदर्शिता र सामुदायिक सहकार्यमा जोड एनआरएनए जापानले नेपाल हाउसप्रति समुदायबाट व्यक्त चासो, जिज्ञासा, सुझाव तथा खबरदारीलाई स्वाभाविक र सकारात्मक रूपमा लिएको जनाएको छ। सार्वजनिक सरोकारका विषयमा पारदर्शिता कायम गर्दै रचनात्मक सुझाव र सकारात्मक आलोचनाको सम्मान गर्ने प्रतिबद्धता पनि व्यक्त गरेको छ।
साथै, आधिकारिक निर्णय र वास्तविक अवस्थाबारे पूर्ण जानकारी नलिई अपूर्ण वा सुनेका सूचनाका आधारमा भ्रम फैलाउने तथा अनावश्यक विवाद सिर्जना गर्ने कार्य नगर्न संघले आग्रह गरेको छ। नेपाल हाउस कुनै व्यक्ति, समूह वा कार्यसमितिको निजी परियोजना नभई जापानवासी नेपालीको साझा पहिचान, गौरव र भावी पुस्ताका लागि निर्माण गरिने साझा सम्पत्ति भएको संघको भनाइ छ। संस्थाको सम्पत्ति, आर्थिक लगानी र समुदायको विश्वास जोगाउँदै परियोजना अघि बढाउन आपसी विश्वास, एकता, सहकार्य र सहभागिताका लागि संघले अपिल गरेको छ।
एनआरएनए जापानले जारी गरेको विज्ञप्ति क्लिक गरि हेर्नुहोस्


