अन्तर्राष्ट्रिय परमाणु ऊर्जा एजेन्सी (आईएईए) ले चीनसहित केही देशका विशेषज्ञको समूहले आगामी साता जापान गएर फुकुशिमा दाईची परमाणु ऊर्जा संयन्त्रको आसपासको समुद्री पानी र माछाको नमुना संकलन गर्ने जनाएको छ ।
यो ऊर्जा संयन्त्रका सञ्चालकले गत साता समुद्री जलमिश्रित प्रशोधित पानीको दोस्रो चरण समुद्रमा पठाउन सुरु गरेको थियो ।
आईएईएले १६ देखि २३ अक्टोबरसम्म एक टोलीले जापान भ्रमण गरेर नमुना संकलन गर्ने जानकारी दिएको हो । यो समूहमा क्यानडा, चीन र दक्षिण कोरियाका विशेषज्ञ पनि सामेल रहनेछन् ।
यी नमुनाको तुलना गत वर्षका नमुनासँग गरिनेछ, ताकि विशेष रुपमा रेडियोधर्मी पदार्थको स्तरमा बदलाबको जाँच गर्न सकियोस् । ऊर्जा संयन्त्रको पानी गत अगस्टदेखि समुद्रमा मिसाउन सुरु गरिएको हो ।
सन् २०११ को भूकम्प र सुनामीपछि फुकुशिमा दाईची परमाणु विद्युत संयन्त्रका तीन रिएक्टर पग्लिएका थिए । जसलाई चिस्याउन प्रयोग गरिएको पानी, वर्षा र जमिनको पानीमा मिसिएको थियो ।
ऊर्जा घरमा जम्मा भएको पानीमध्ये अधिकांश रेडियोधर्मी पदार्थ हटाउनका लागि प्रशोधन गरिएको छ । तर अझै ट्रिटियमको मात्रा केही मात्रामा रहेको छ ।
प्रशोधित पानी प्रशान्त महासागरमा मिसाउनुअघि ऊर्जा संयन्त्रको सञ्चालक टोकियो इलेक्ट्रिक पावर कम्पनीले ट्रिटियमको स्तरलाई विश्व स्वास्थ्य संगठनको पेयजल सम्बन्धी दिशानिर्देश अनुसार घटाएर समुद्रमा मिसाइरहेको छ ।
