जापानी येन ऐतिहासिक कमजोर बनेपछि रेमिट्यान्स पठाउनेहरुलाई मर्का परेको छ । मंगलबार ऐतिहासिक कमजोर बन्दै जापानी येनको विनिमयदर १ डलर बराबर १५० येनभन्दा बढी कायम भयो ।
यो दर करिब एक वर्षयताकै सबैभन्दा उच्च गिरावट हो । टोकियो विदेशी मुद्रा विनिमय बजारमा ३ तारिखमा येन गत वर्ष अक्टोबरपछिकै सबैभन्दा अवमूल्यन देखियो ।
अमेरिकामा दीर्घकालीन ब्याज दरहरू बढ्दै जाँदा, डलर किन्ने र येन बेच्ने लगानीकर्ताहरुको संख्या ह्वात्तै बढेपछि १ डलर बराबर १५०.०५४ येन पुगेको हो ।
जापानी येनको यस्तो कमजोर अवस्था गत वर्षको अक्टोबरपछि पहिलो पटक देखिएको हो ।
यद्यपि मंगलबार साँझपख फेरि जापानी येनको कारोबारमा सुधार देखियो । अमेरिकामा दीर्घकालीन ब्याजदर बढेसँगै जापानले पनि दीर्घकालीन ब्याजदर बढाउँदै गएको छ ।
जापानको ब्याजदर २ तारिखमा करिब १० वर्षयताकै उच्चतम बिन्दुमा पुगेको छ ।
यद्यपि अमेरिकी डलरबाट प्राप्त हुने लाभ बढी भएका कारण लगानीकर्ताहरु जापानी येनमा आकर्षित भएनन् ।
जापानी येन कमजोर बन्दा आम सर्वसाधारण तथा जापानबाट अन्य मुलुकमा रेमिट्यान्स पठाउने कामदारहरु सबैभन्दा बढी मर्कामा परिरहेका छन् । जापानबाट नेपालमा रेमिट्यान्स पठाउनेहरु पनि येनको अवमूल्यनका कारण मर्कामा परेका छन् ।