जापानमा जागिर छाड्ने शिक्षकको संख्या कीर्तिमानी स्तरमा पुगेको छ । मानसिक स्वास्थ्यका कारण जनाउँदै जापानका सार्वजनिक विद्यालयका शिक्षकहरुले धमाधम जागिर छाड्न थालेका हुन् ।
सन् २०२१ मा मात्रै जापानमा ९५३ शिक्षकहरुले मानसिक स्वास्थ्यको कारण देखाउँदै जागिर छाडेका छन् । यो संख्या सन् २०१८ मा गरिएको सर्वेक्षणको तुलनामा १७१ ले बढी हो ।
सरकारी प्राथमिक विद्यालय, जुनियर हाइस्कुल र सिनियर हाइस्कुलमा पढाउने शिक्षकहरुले लामो समय काम गर्नुपरेकाले पनि जागिर छाड्ने क्रम बढेको शिक्षा मन्त्रालयको सर्वेक्षणमा देखिएको छ ।
<樂威壯 p>अधिकारीहरुले शिक्षकहरुको मानसिक स्वास्थ्यलाई तत्काल मुद्दाका रुपमा सम्बोधन गर्नु आवश्यक रहेको पनि जनाएका छन् ।शिक्षा, संस्कृति, खेलकुद तथा प्रविधि मन्त्रालयले गरेको सर्वेक्षणमा २०२२ को मार्चमा सकिएको शैक्षिक वर्षमा अवकाश बाहेक अन्य कारणले जागिर छाड्ने कुल १२ हजार ६५२ शिक्षकमध्ये ८ प्रतिशतले मानसिक रोगका कारण राजीनामा दिएको पाइएको छ ।
सर्वेक्षणले प्रारम्भिक विद्यालयका ५७१ शिक्षकले राजीनामा दिएका छन् । जुन अघिल्लो सर्वेक्षणको तुलनामा ११४ ले बढी हो ।
यस्तै जुनियर हाइस्कुलका यसअघिको तुलनामा ३५ जनाले बढेर २७७ जना र उच्च माध्यमिक विद्यालयमा २२ जनाले बढेर १०५ जना शिक्षकले राजीनामा दिएका छन् ।
गत वर्षको अन्त्यमा जारी गरिएको सर्वेक्षणको नतिजाअनुसार मनोवैज्ञानिक समस्याका कारण अनुपस्थितिको बिदा लिने सार्वजनिक विद्यालयका शिक्षकको संख्या ५ हजार ८९७ रहेको छ ।
शिक्षकहरुले कामको बोझ र लगातार लामो समय काम गर्नुपर्ने भएका कारण पनि शिक्षक बन्न चाहनेको संख्यामा कमी आएको छ ।
जसका कारण बिदा लिएका शिक्षकको स्थानमा पदपूर्ति गर्न समेत समस्या देखिएको छ ।
शिक्षकको अभाव पूरा गर्न मन्त्रालयले शिक्षकको काम गर्ने अवस्थामा सुधार गर्ने तथा सहायक कर्मचारीहरु बढी संख्यामा राख्नेबारेमा योजना बनाइरहेको अधिकारीहरुले जनाएका छन् ।
