टोकियो । जापानको टोेकियो नजिक स्कुले विद्यार्थी बसेको रिसोर्ट हिमपहिरोमा पुरिँदा विद्यार्थीसहित आठ जनाको मृत्यु भएको छ ।
तोचिगी क्षेत्रको नासु भन्ने स्थानमा रहेको एक रिसोर्टमा ती विद्यार्थीहरु रहेका थिए ।
सरकारी अधिकारीहरुले हिमपहिरोमा कति मान्छे फसेका छन् भन्ने पुष्टि नभएको जनाएको जापानको सरकारी सञ्चारमाध्यम एनएचकेले जनाएको छ ।
आगो नियन्त्रण विभागले ३० भन्दा बढी मानिस घाइते भएको जनाएका छन् । हिमपहिरो स्थानीय समय अनुसार ९ बजेर २० मिनेटमा गएको जनाइएको छ ।
जापानी सञ्चार माध्यमहरुले सातवटा स्कुलका ६० भन्दा बढी स्कुले विद्यार्थीहरु बिहान ७ बजे हिम ढलान चढ्न सुरु गरेका थिए ।
जापानको मौषम विज्ञान विभागले उक्त क्षेत्रमा हिमपहिरोहरु जानसक्ने भन्दै सतर्क रहन आग्रह गरेको छ । जापानी प्रधानमन्त्री सिन्जो आवेले विपद्मा परेकाहरुको उद्धार आफ्नो पहिलो प्राथमिकता भएको बताएका छन् ।
