टोकियो । गैरआवासीय नेपाली संघ (एनआरएनए) जापानले नेपाल जापान कुटनैतिक सम्बन्धको ६० औं वर्ष गाँठको उपलक्ष्यमा शनिवार र आईतवार गरी २ दिवसीय नवौ नेपाल फेष्टिवल टोकियोको योयोगी पार्कमा भव्य रुपमा सम्पन्न भएको छ ।
नेपाल फेष्टिवल मुल आयोजक समितिका संयोजक तथा एनआरएनए जापानका अध्यक्ष सुदन थापाका अनुसार फेष्टिवल भ्रमण गर्नेहरुको संख्यामा अघिला वर्ष भन्दा यस पटक उल्लेख्य उपस्थिति रहेको बताए ।
दुई दिनमा दुई लाख भन्दा वढीले फेष्टिवल अवलोकन गरेको र फेष्टिवल अवधिभर पाँच करोड बराबरको आर्थिक कारोवार भएको आयोजकले बताएको छ । फेष्टिवल अवलोकन यसपटक जापानी भन्दा नेपालीहरुको उपस्थिति बाक्लो रहेको थियो ।
फेष्टिवल अवधिमा स्वास्थ्य सचेतना तथा मानसिक स्वास्थ्य परामर्श शिविर पनि सञ्चालन गरिएको थियो । हजारौंको संख्यामा नेपाली लगायत जापानीहरु भेला भएर नेपाली संस्कृति, खानाका परिकार तथा नेपाली पहिचान झल्कने भेषभुषा तथा सांस्कृतिक कार्यक्रमको मनोरञ्जन लिएका थिए ।
फेष्टिवलमा व्यावसायिक ३० स्टलहरु र २० खानाका स्टलहरु राखिएको थियो भने विहान देखि साँझ समापनसम्म सांगीतिक माहोल प्रमुख आकर्षण रहेको थियो ।
नेपालका तर्फबाट कार्यवाहक राजदूत र जापानका तर्फबाट परराष्ट्र मन्त्रालयका एक अधिकारी सहित पूर्व राजदूतहरुको विशेष उपस्थितिमा फेष्टिवल उदघाटन गरिएको थियो ।