टोकियो । कोकोको मूल्य तीव्र रूपमा बढिरहेका बेला जापानका डिपार्टमेन्ट स्टोरहरू भ्यालेन्टाइन डे उपहारको मुख्य बिक्री सिजनमा प्रवेश गर्दैछन्।
बढ्दो चकलेटको मूल्यले ग्राहकलाई झट्का नलागोस् भन्नका लागि कम्पनीहरूले नयाँ रणनीति अपनाएका छन्।
महँगो चकलेटलाई आकर्षक बनाउन केही स्टोरहरूले सेफद्वारा प्रत्यक्ष चाख्ने कार्यक्रमसमेत सुरु गरेका छन् भने चकलेटबाहेकका मिठाइको दायरा पनि विस्तार गरिएको छ।
सोगो एन्ड सेइबुले चकलेटको मूल्य गत वर्षको तुलनामा करिब ३० प्रतिशत बढाए पनि चकलेटबाहेकका विकल्पहरू दोब्बर बनाएको छ। यसमा बिस्कुट, ग्यालेत र गमीजस्ता मिठाइहरू समावेश छन्।
टाकाशिमायाले पनि कोको प्रयोग नगरेका नयाँ उत्पादनहरू ल्याएको छ। मटरलगायत सामग्रीबाट बनाइएको वैकल्पिक मिठाइ परम्परागत चकलेटभन्दा करिब २० प्रतिशत सस्तो छ।
मित्सुकोशी इसेतानले फलफूल र नट्स बढी प्रयोग गरिएको कम चकलेट भएको उत्पादन बढाएको छ।
चकलेट बेच्ने तरिका पनि परिवर्तन हुँदैछ। मात्सुया गिन्जामा सहभागी ब्रान्डमध्ये करिब ३० प्रतिशतले प्रत्यक्ष खाने सुविधा वा लाइभ प्रदर्शन प्रदान गरिरहेका छन्।
फ्रान्सेली रेस्टुरेन्टका पेस्ट्री सेफले ग्राहकअगाडि नै बनाइदिने कोर्सको मूल्य करसहित १८ हजार ७०० येनसम्म पर्छ।
यता, भ्यालेन्टाइन डे मनाउने तरिकामा पनि परिवर्तन देखिएको छ। मात्सुया गिन्जाको सर्वेक्षण अनुसार ६५ प्रतिशत सहभागीले ‘आफ्नै लागि चकलेट किन्न’ योजना बनाएका छन्, जुन प्रेमी वा जीवनसाथीका लागि किनिने चकलेटभन्दा बढी हो।
यसले जापानमा भ्यालेन्टाइन डे अब प्रेम प्रस्ताव गर्ने दिनभन्दा पनि आफूलाई खुशी बनाउने दिनतर्फ रूपान्तरण हुँदै गएको संकेत गर्दछ।
