टोकियो । टोकियो महानगरपालिकाले अत्यधिक गर्मीको सामना गरिरहेका बासिन्दाहरूलाई राहत दिनका लागि यो गर्मीको मौसममा पानीको आधारभूत शुल्क (basic water fees) निःशुल्क गर्ने घोषणा गरेको छ। गभर्नर युरिको कोइकेले मंगलबार आयोजित पत्रकार सम्मेलनमार्फत यस निर्णय सार्वजनिक गरेकी हुन्।
यो योजना अन्तर्गत टोकियो महानगरको जल आपूर्ति प्रणालीमा आबद्ध करिब ८२ लाख घरपरिवार लाभान्वित हुनेछन्। योजना अनुसार, चार महिनासम्म, अधिकांश घरपरिवारले तिर्दै आएको नियमित आधारभूत शुल्क मिनाहा गरिनेछ।
कोइकेले भनिन्, “हामी टोकियोवासीहरूलाई यो गर्मीमा सुरक्षित र स्वस्थ राख्न चाहन्छौं। पानी जति सकिन्छ सहज बनाउनु हाम्रो प्राथमिकता हो।”
महानगरपालिकाका अनुसार, २० मिमी व्यासको पानी पाइप प्रयोग गर्ने घरले करिब ¥५,००० बचत गर्नेछन्। यद्यपि पानीको वास्तविक खपत अनुसार लाग्ने थप शुल्क भने यथावत् रहने जनाइएको छ।
यस कदमको उद्देश्य गर्मीको चपेटामा परेका नागरिकहरूलाई स्वास्थ्य समस्या, विशेष गरी हीटस्ट्रोकबाट जोगाउनु रहेको छ। गत गर्मीमा, टोक्योमा हीटस्ट्रोकका कारण हजारौं मानिसहरू अस्पताल भर्ना भएका थिए।
यो निर्णयले टोकियोवासीहरूलाई एक हदसम्म राहत दिने अपेक्षा गरिएको छ। योजना स्वतः लागू हुनेछ, र उपभोक्ताले अलग्गै आवेदन दिनु पर्ने छैन।
